為坐飛機而去旅行
平時我唔多去旅行
但眼見第二個小朋友就黎要出世
個女又成日好想坐飛機
而且11月學校剛好有4天假期
我又只須要請兩日假就可以
如果依家唔帶個女去
之後可能又要等4年BB大過啲之後先可以再去
所以今次膽粗粗去找平機票（坐飛機是重點之一）
而我因為識日文但唔識英文......汗
坐飛機目的地首選行程當然係日本各地自由行啦
擬定目的地，解決問題
咁我就係網上找有乜地方係比較平的
目標行程對象找到兩個
一個係中部愛知縣的名古屋，一個係九州的鹿兒島
結果我揀咗香港航空去九州鹿兒島
價格都在5000元左右3張機票
睇黎唔錯，就差老婆果邊。
問過老婆後，佢本身想係10月黃金週去
結果當然係貴出一大截而放棄左（好似要9200左右，果然係黃金週特別甘）
訂完機票之後，我就着手了解各種登機問題
特別係有小BB的孕婦（大肚婆）搭飛機的要求或規定
了解到原來過咗32週就唔可以坐飛機
28週以上要有醫生紙
但只要在27週之前就可以不用醫生紙乘坐飛機
檢查過預產期後
確認無問題就檢查護照有無過期同女兒的身分證係唔係一齊
女兒的護照剛好還有約1個月就過期
在網上同入境處了解過還可以用
咁就去訂酒店
呢個時候嘅酒店已經無禁煙房了
而且再近一點中央站的也沒有房了
所以我就訂了都係附近的東橫INN吸煙房
結果上來說係無感到有煙味
而我所選的是雙床房，而唔選一張大床
因為我怕女兒睡覺時會一腳踢落去，咁就麻煩大了
搵資料安排行程
在快到11月之前
我仲未諗到去鹿兒島做乜、睇乜、食乜
連錢都未唱好
因為大家都未有主意
我去找了一些網站了解一下
亦都無法特定要去邊個地方或景點
呢個可能係自由行的苦惱吧～笑
咁就去圖書館找鹿兒島的書吧
但只能找到覆蓋較大的九州旅遊書
而我女兒見到旅遊書內的溫泉就話好想去浸溫泉同埋食刨冰
禁我就安排落去行程度啦
我老婆亦找了一個認識的日本人
剛好是鹿兒島出身的
就叫了他介紹一下鹿兒島有乜好去處
同有乜野係鹿兒島必食必買
得到他的建議後，我就以他的意見來編排好4日行程
主要安排都係集中在市中心，唔洗成日坐好耐車嘅行程
他介紹的必食食物有
黑豬黑牛地雞的火鍋、炸豬扒、黑牛扒、地雞刺身、拉麵同刨冰
活動有城山酒店溫泉、家庭風呂、櫻島觀光
手信主要都係用蕃薯製的甜點為主
同埋必買手信就係薩摩蒸氣屋的奶黃蛋糕「かすたどん」
他還提示了我們櫻島係活火山，唔好彩嘅話會有火山爆發，
最差的情況係成街都係灰，仲話係常有之事......汗汗
安排好之後
再比老婆過目
唱錢、準備出發物品
11月頭，我去匯豐的外幣機對換好日元
預算是10萬日元，約7千2左右
其他消費就到時用信用卡比
再到13號，即係飛前一晚預辦登機。
再檢查一下行程中要帶啲乜嘢
然後開始整理入箱
內容有
帶孕婦資料、準備衣物襪帽、平安藥、口罩、護照及身分證(女兒)
充電器/充電線、乾糧、清潔用品、紙巾、自拍神器(充電)、太陽眼鏡、剃鬚刀
口罩是因為當地的流感比較嚴重，日本人提議要帶的
了解突發交通情況，做定準備
所有準備出發的東西準備好後
就了解一下交通情況
當天巴士有好多都唔開
去機場要多做準備
我本身係諗住坐機場巴士直接去到機場的
問了一下同事介紹坐機場快線
呢個我以之由東京返香港時坐過
但一程都唔平，來回更要差唔多205元（巴士單程才45元）
細問之下，原來佢話有個叫KLOOK的可以買車票平啲
我睇返係平咗唔少，雖然都唔算好平，2個人276元來回
不過可以在去機場前就可以預辦登機手續
又唔洗去到機場先再排一條隊
仲可以早啲將行李直接送上飛機
唔洗自己攞住
係呢兩個優點下都還可以接受
出發
第一日行程 14號 星期四 在鹿兒島市中心 預算計劃表
出發 6:00～6:30 坐A12巴士（半小時一班）
9:00 到機場一號客運大樓第七層K/H段 2小時未計塞車
機場 9:30 排隊或拍機攞機票 30分鐘 (請於航班起飛前90分鐘辦理登機手續)
10:00 安檢及去登機口30分鐘 (登機閘於航班起飛前20分鐘關閉)
10:00~11:00食啲野
11:15～15:10坐飛機
到達 坐巴士(通知司機)去鹿兒島市內 1小時。 4:30左右到 3250日元
登記 東橫INN 放底行李 5:00左右 共24,305円
晚餐 在附近AMU PLAZA食 いちにいさん 火鍋 1萬日元
去買一日乘車券 1500日元 再回酒店休息 計3.9萬日元
當日實況
我地本身係11點的飛機
晨早5:00我就已經起身叫醒晒一家人去做出發準備
約5:30就出門
但當天機場巴士沒有開
我就諗住坐小巴轉地鐵，但好長的一條龍.....
見到前面有的士諗住過去坐
點知比人搶晒.....
好在前面巴士站有架巴士啱啱到
係可以接駁到機場快線的
我地就雞禁腳跑去
雖然多人，但都總算上到車。
去到機場快線
剛好撞到同事排在後面
真係禁鬼啱都有
佢地架機比我地早1個小時左右
攪到比老婆抱怨點解禁早出門......
因為晏啲唔知有無車坐麻。
到機場辦理完所有手續後
就到機場餐廳食早餐
初時找到的是比較外圍的位置
但比較凍同有風
我地就再去入啲搵位啦
食完早餐，等夠鐘登機
其間我去找入飲用暖水的地方入水
然後就到登機口
沒想到，撞見以前同一幼稚園的同學也剛好去鹿兒島
我們打個招呼就各自排隊了
坐上飛機後，等了一段時間才起飛
過程總算順利。
在機上，我老婆可能有小BB的關係
經常想去厠所
好在我選了一個比較近厠所的位置
由於是廉航，當然沒有正式的飛機餐
但香港航空還有一個小食盒同有飲品
叫做頂下肚，都係啲即食野為主。
4:30到達鹿兒島機場
發覺真係比大城市的細很多
等候的空間也不大
兩下子就出到國際線機場大堂
然後行去國內線大樓坐巴士
我順便了解一下國內線大樓
同埋嘗試租借wifi sim卡
但搞了一輪之後，張卡話要7點鐘才可以攞
咁我就唔攞算數，去坐巴士買車票去。
當我用售票機買車票時，由於不熟悉操作
點按都係無反應
結果就去了旁邊的人工窗口櫃位買票
再排隊等上車
其間
我睇到原來係入左錢先至撳掣買飛......
坐上巴士後
我發覺到架巴士不斷叫站
才醒起巴士有分直達同站站停兩者之分
雖然時間上唔係差好遠，但老婆又想去厠所了。
早知再了解一下係唔係直達。
下次見到圖片中，巴士寫禁多站就知道唔係直達啦～
到達巴士站落車，好在馬上就有厠所
之後就到處去找
行去旅店的路
在隧道穿過中央站口就會到我們的旅店
但指示不太明確
我們結果都係出返地面行過去。
入到旅店登記，我預約左7:00到的
早了1小時左右
我比本護照職員登記
但他不斷用英文同我講
而我就不斷用日文回應返個職員
真係搞笑
最主要佢問我不打掃的日子
因為可以平啲同免打擾
講完比錢攞卡就上房。
房子還算漂亮，而且無味
窗外還可以望到遠景、火山同摩天輪。
放好行李後
我地就去旁邊Amu plaza食123火鍋
我地點左火鍋之後，發覺份量唔算多
就多點一個炸豬排飯餐
夾理都已經差唔多1萬日元
但食起黎無想像中禁好食
而我老婆最唔慣係佢個鍋齋用水煮
平時我地係香港食
總會叫甚麼豉油湯底啊蕃茄湯底啊咁
可能佢想比我地食到食材同醬料原味吧
但看來我老婆不太受落
最後
我仲見到黎呢度食嘅人都係點蒸煮套餐
睇黎我點錯了......
食完之後，去Lawson找一日乘車劵
初時找了個男性店員（看來像留學生）
查詢有無得賣
點知佢叫我去車站買
我話呢度唔係有得買咩？
佢就再找令一個女的店員問
好在佢話有，禁我就順利買到車券了
期間女兒見到一本有玩具的書就好想買
我見個玩具都幾有趣
係日式抽獎箱Bingo
禁就幫佢買咗
然後在便利店再買些吃的喝的
就回酒店休息
沖涼時
我女兒最開心就係可以在浴缸內泡
玩得不亦樂乎
然後大覺瞓
第二日行程 15號 星期五 去城山酒店 七五三節しちごさん
上午 附近走走
10:50車 坐直通巴士 去城山ガーデンズ 水簾
午餐 湯～ったりランチプラン ●要預約 1萬日元
活動 浸溫泉及休憩 2:00～2:50 4千日元
回程 通知司機朝日通下車
行去 Dolphin Portドルフィンポート海濱公園4:00～6:00
活動 イオワールド水族館 3千日元
晚餐 回転寿司めっけもん5千日元或其他
食完行去いづろ通り 坐電車2系統回酒店 420日元
計2.2萬日元
當日實況
早上在旅店食過自助早餐
（這天還算不錯，有咖喱飯食）
再到附近行了一下同去商場走走
快要10:20
就提早去坐城山酒店專車去食午飯
本來我網上預約左係
12:30食午飯，1:30浸浴
但我老婆覺得早啲去可以早啲完
咁去到之後就試下問下可唔可以改早到
11:00午餐12:00浸浴
結果係家庭私人浸浴要1:00先可以入去
我地就改為11點30午餐然後再1點再入去
同日因為係七五三節
即係祈求七歲五歲三歲嘅小朋友健康成長
所以我就預訂咗節日會席料理比個女
而我就同老婆食夫婦套餐包拍照留念
不過女兒並不太喜歡呢個餐
睇黎唔係禁啱佢胃口
而且份量亦多，食唔晒.....汗
最後都係由我去清理，想唔變肥都唔得......
吃過午飯後就到家庭浸浴去
本來唔係去家庭浸浴的
而係應該在一望無際的景色下泡溫泉的
因為我老婆大肚，單獨照顧女兒不太方便
所以改為家庭式浸浴
避免發生意外
我地先沖好涼
沖乾淨左身體之後就去浸浴了
浸浴時，水溫設在42度
剛開始還是可以接受
但浸唔夠兩下就想上水
慢慢我就加凍水加到39度左右就舒服多了
好在係家庭式，女兒一黎就一下子跳落水
如果係公共溫泉影響到人就唔好啦
到浸浴完後
我地坐返直達巴士出返去市中心
在途中的公園下車
再行過去海濱公園同水族館
去到橋頭，搞唔清邊度入去水族館
再了解一下之後才發覺唔係過橋
而係在碼頭旁邊入去
而我無諗過嘅係
原來我買的一日乘車劵裏面
原來有各景點的優惠
結果我比了全費入場......哭
水族館唔算好大
但都有個巨大水槽同好多野介紹
仲有水母展覽同最高一層有單面展望台
睇完之後去海濱公園的商店
買些煮餸用的東西帶返香港
同埋買左啲紫薯薯片嚟食
然後再去附近找了一家燒肉店食晚餐
食完晚餐，再慢慢走回去旅店
順道行去天文館的白熊刨冰度食刨冰
本身只係小朋友食的話，有縮小版
但我地三個人食一份， 所以店員建議我地叫一般大小的
可惜當晚忘記去旁邊的公園睇燈飾
而且晚上開始天氣好凍
所以都多穿了衣服
行回去都差不多20分鐘
回到旅店，我女兒當然又去浸浴泡個夠了
晚上氣溫超凍，我差點都凍到感冒了
第三日行程 16號 星期六 天文館
上午 (車券)坐電車2系統去天文館 アニメイト鹿児島
午餐 豚トロ 3千日元
活動 天文館駅＞朝日通 かごしま近代文学館1千日元
晚餐 坐電車2系統 朝日通＞高見馬場 華蓮 火煱或牛扒 1.5萬日元
甜品 步行去天文館公園 天文館むじゃき 2千日元
電車2系統 天文館駅＞鹿兒島中央
返酒店 預辦登機 計2.1萬日元
當日實況
早上都係好凍
明明旁邊沖繩仲有２３度
鹿兒島氣溫居然得8度......比東京新宿仲凍
本身就今日先至去食嗰個
天文館嘅白熊刨冰
但昨天已經食咗啦
所以今日就唔會再去食啦。
一朝早我哋訓到差唔多8:30先至去食早餐
今次嘅早餐就唔係幾好食
就得幾個麵包同飯團
但女兒一直望住個電視
所以食到9:30都未食完
之後我地就用一日乘車劵
坐電車出發去天文館
今日首先就去呢個「アニメイト」啦
呢個鹿兒島市中央嘅唯一一間動漫展館
我都係入去行個圈
再俾個女夾左一下公仔就走了
免得佢地悶
然後就去鹿兒島近代文學館
嗰度有個童話博物館。
因為今次童話博物館我有用到優惠券
所以今日可以平少少入去
博物館入面有三層樓
同埋地下有一層，我哋喺一樓度玩左無耐
就話地下開始講故事
睇嘅人就冇幾多
都係得兩個家庭即係我哋三個家庭。
睇故事嘅模式係佢中間會有啲選擇題
個故事會因應最多人選擇嘅選項而有所不同
之後我哋由上面3樓
再兜咗個圈落返黎地下再玩一陣咁就走啦
最有趣應該就係個電子屏幕吧
行埋去會見到自己
在屏幕中穿了不同的衣服
定時轉唔同嘅童話主題
行返去天文館附近
諗住去食嗰度出名嘅拉麵「豚トロ」
但因為太多人咁我哋就冇去食到啦。
然之後我哋就一直向前行
行到去令一間拉麵店
但係咁啱想入去嘅時候
有個女人係門口仆親
成個跌咗落地
咁我哋最後都冇去到
行返轉頭少少
就見到間西式餐廳食意粉同埋薯蓉嘅。
入到去
好多學生好似在慶祝甚麼似的
咁我哋就一路等下食下
點知突然店主慶祝有人生日
咁我哋就一齊搞下氣氛
再食一陣就走了。
本來今日要做嘅已經做完啦
咁所以就改去另一個目的地。
我哋最後決定坐櫻島嘅船去櫻島火山
其實我就唔覺有啲乜嘢好睇嘅
不過後來我搵咗個恐龍公園去俾個女玩下
而且去公園個條路一路行行行
都行得幾辛苦，因為都幾斜下
大約用左15分鐘
上到去公園
發覺都幾大同埋都幾多嘢玩
我哋都玩咗好耐先走
所以結果都值得嘅
最深刻就係嗰條超長嘅滑梯。
附帶一提
船上小賣店還有教鹿兒島方言的橫額
然後我地坐船返去天文館附近
諗住去食嗰間日本人介紹嘅華蓮
點知去到發覺滿座
禁我哋就過對面
一間睇落門面都唔錯嘅鐵板料理店
食鹿兒島牛同燒肉
席間，我地同職員有講有笑
佢仲請女兒食鐵板燒蕃薯添
叫野飲時，我誤會咗個飲品名
因為放得太埋，叫錯左
好在我無一次過叫晒
禁我就自己飲左果杯叫錯了的.....
感覺上係一間比較親民的小店
但價錢就唔係禁親民
最後埋單加埋加一都要9千日元。
食完就坐電車返旅店附近的「ユニクロ」
因為本身無預到會禁凍
所以臨時買件羽絨同保暖褲比個女着
就回旅店了
第四日行程 17號 星期日 在鹿兒島市中心
登記 收拾好10:00離開
早上 鹿兒島市 文具のしんぷく 本店
午餐 11:00回転寿司めっけもん5千日元 /
イオン 3千日元 又或係機場國內線食午餐
中午 12:00坐巴士去機場 3250日元
機場 13:00去國內線買手信
手荷物一時預かり（国内線1F）
薩摩蒸気屋 かすたどん 1萬日元
14:00安檢及去登機口
16:00～18:50坐飛機
回港 坐A12巴士返家
計1.8萬日元 全部合共10萬日元
當日實況
早上食過一些早餐後，就收拾好東西
然後把行李交到前台保管
同埋辦理退房手續就去文具店睇文具。
途中經過一個公園
我哋就喺嗰度玩咗一陣，追吓白鴿
買完文具睇完文具之後
就返去中央站嗰度食午餐
因為老婆話全程冇食過拉麵
所以我哋就係中央車站
揀咗間拉麵店食
兒童餐仲可以俾小朋友選一份玩具
帶返屋企玩添。
我哋食完拉麵就坐巴士去機場啦
呢刻我終於知道點樣睇到係唔係直達巴士
同埋嘗試係售票機嗰度買車票
不過呢部機就易明好多
同時都發現佢有寫住
話直達班次係幾時開出
原來直達同非直達去機場的路程
相差只係1分鐘@@
上車時
那些攞行李的職員會問你
係搭邊間航空公司
佢就會同你分類放入車。
坐巴士去機場，會先去國內線的站台
我地就直接落車去國內線買手信
特別係去薩摩蒸氣屋嗰度
買嗰個奶黃蛋糕
（有啲似東京バナナ）
一上到去，我怎麼找也找不到
好在最後行入啲都搵得到
我就計算好要比乜野人手信後就去採購。
買完晒野之後我哋就返去國際線啦
可能指示唔夠清晰
一入去我唔知道要去做登記手續嗰度先
就禁直接上咗去上面嗰層，即係安檢嗰度
可能扶手電梯太吸引我了～～
上到去，一直等等等
等到可以入去安檢為止。
我地就去排隊啦，期間我覺得很奇怪
點解啲人個個嘅護照上面都有機票
而我沒有
問人先知原來係下面果層要做安檢先。
但一啲都唔似喺度做登記
或者我太早同埋唔係由正門入吧
辦理登記手續照X光期間
有職員問我有冇把Wi-Fi放在箱內
本身醒唔起有，就話無
之後佢地想再過機，再問我裏面有無電池
我就話那個只係充電插頭
直接打開睇會易明啲
比佢地睇完之後
就去辦手續了。
辦理好登記手續同埋安檢手續之後
無意識到要倒水
係安檢度倒晒啲水之後
諗住入去裝返
點知無水機，局住去買支水嚟飲
不過裏面嗰一間商店都算多嘢賣
不過只係好長龍啫
我老婆都買咗啲免稅朱古力
跟住就坐飛機返去啦。
4天行程就此完結
後記
呢次鹿兒島旅行
本身係想屋久島睇大樹
種子島睇火箭發射基地
霧島公園同指宿沙浴的
但時間有限，仲有小BB
所以就只選市中心為主的行程
避免了太多的行走同等待的時間
希望下次可以去埋啦～～
