好多學生學到「疑問詞＋か」同「かどうか」時，都會覺得兩個好似差唔多。反正都係放喺句中間，又譯做「唔知道」，於是就好易混淆。
有一次上堂，我問學生：「知唔知劉同學幾時嚟？」
學生答：「唔知道。」
我就順勢寫：
劉さんがいつ来るかわかりません。
大家通常都覺得冇問題，因為聽落好似無乜嘢。
但之後我再寫一句：
❌劉さんがいつ来るかどうかわかりません。
全班即刻露出疑惑嘅表情。明明只係多咗個「どうか」，點解又唔得？
簡單啲咁講，
當你問「劉同學幾時嚟」嘅時候，
可能係八點，可能係九點，可能係下星期。
答案有無限種可能。
但「かどうか」係用嚟判斷兩件事之間邊個啱或者二選一。
佢有種「係唔係」、「有冇」、「會唔會」嘅感覺。
例如：
劉さんが来るかどうかわかりません。
「佢會嚟，定唔會嚟，我唔知道。」
答案只有兩個可能。
我會同學生講，「かどうか」其實好似一個 Yes／No 探測器。
當你心入面存在兩個相反嘅可能性時，就可以用佢。
例如唔知道自己係咪病咗：風邪かどうかわかりません。
唔知道間餐廳好唔好食：おいしいかどうかわかりません。
唔知道銀行需唔需要印章：はんこが必要かどうか確認します。
呢啲情況都有一個共同點，就係結果到底係 A 定係 B。
喺日常生活，假設你同朋友約好咗食飯。
如果你已經肯定佢會嚟，只係唔知幾點到，咁就會講：
友達が何時に来るかわかりません。
但如果約定時間都過咗，佢仲未覆訊息，你開始懷疑佢會唔會放飛機：
友達が来るかどうかわかりません。
因為你想知道嘅已經唔係時間，而係「嚟定唔嚟」。
又例如你網購完一件貨。
你收到通知話已經寄出，但唔知幾時送到就會諗：
荷物がいつ届くかわかりません。
如果物流幾日都冇更新，你開始懷疑件貨到底有冇寄出就會諗：
荷物が届くかどうかわかりません。
重點嚟啦
但當句子入面已經有「誰」、「何」、「どこ」、「いつ」、「どうして」呢類疑問詞嘅時候，情況就完全唔同。
因為疑問詞本身已經指定咗你想知道嘅資訊內容。
例如：
誰が来るかわかりません。
どこに住んでいるか知りません。
何を買うか決めていません。
既然問題已經存在，就直接用「か」，唔需要再加「どうか」。
所以好多學生最常犯嘅錯，就係見到兩個文型都學過，於是唔小心將佢哋「組裝」埋一齊：
❌ いつ来るかどうかわかりません
❌ どこへ行くかどうか決めていません
❌ なぜ休んだかどうか知りません
文法上就變成一個好奇怪嘅問題。
廣東話就會變成根本唔知道想問啲乜嘢：
「佢幾點嚟定唔知嚟唔嚟？」
「點解休息定唔知休唔休息？」
想記住嘅我都係嗰句，「唔好溝埋一齊」做瀨尿牛丸
掌握咗之後，
你會發現新聞、報告、論文、N3到N1閱讀入面到處都係呢兩個文型。
例如：
原因が何か。即係探討「原因係乜」。多過兩個可能性
成功できるかどうか。即係探討「能否成功」。只有兩個可能性
小測驗：你又會點㨂？
①試験が（ ）まだ知りません。
A. いつあるか
B. いつあるかどうか
②中島さんが会議に来る（ ）確認してください。
A. か
B. かどうか
③次の休みにどこへ行く（ ）まだ決めていません。
A. か
B. かどうか
答案在下方
↓
↓
↓
答案
1-A 2-B 3-A
三題都啱晒嘅話，你已經掌握到「疑問詞＋か」同「かどうか」最核心嘅分別。
唔會咁易變成「爆漿」瀨尿牛丸～
#日文文法 #かどうか #N4文法 #N3文法 #JLPT #學日文 #日本語 #日語教學 #零檸聲些 #日文老師 #日語學習
