首先，學一門外語要多少時間？
學語言係一件長時間嘅事情，
就好似學英文咁，大約要3000小時。
詳細可以參考以下連結（日文內容）
學日文都要咁多時間！？
當然無咁多，日文大約係1100小時。
而且日文多由中文及英文組成，
- 日文嘅漢字同語彙與中文有共通性，對香港人黎講有優勢。
- 英文同中文差異大，所以需要更多時間。
所以，對中英夾雜的香港人黎講，
日文係最好學嘅外語。
咁點樣設定呢1100小時？（五步學習法）
首先實在地分階段地遂一行出呢五步，掌握必要內容：
- 第一步： 50音＝日語的根基
- 第二步： 疑問詞 助詞
- 第三步： 助詞 疑問句 詞性
- 第四步： 動詞轉形 N5程度
- 第五步： 整個日語基礎 約N4至N3程度
- 第六步： ⋯⋯
點解我唔可以馬上學識外語？（為何不能「速成」？）
其實如果你可以有全職時間學日文的話，
半年都可以學會。
而唔少人覺得1年就學會日文，
但點解唔會有人諗住1年就學會英文？
好多語言課程的推廣都話三個月學會外語之類，
標榜有多麼的容易，多麼的快。
但點解學校教育唔令你三個月學會英語？
係因為學校唔想我學得咁快嗎？
其實又點會唔想你學得快，
要搵出原因的話可以歸納以下兩點：
1：係避免「消化不良」
老師其實想一次過教晒學生所有野，
馬上識晒，越快越好添～！
但人的每小時吸收量是有限的。
所以才要設定適合的量黎教，
咁先唔會「消化不良」記到頭都爆。
例如要你在一星期內記晒英文所有不規則動詞。
2：教學，最重要係做好個「循環」
點解成日話大人學野記唔到？
細佬學野特別記得到？
其實唔係特別記得，而係學校做好左個「循環」成年人要自己創造。
學習係點樣循環？
就如學校般，有上堂、功課、活動、默書、測驗、考試、回顧、評估等......
但内容都係圍繞住同一樣野，所以才會「容易記得」。
成年人的學習有何不同？
成年人的學習就好似上講座咁，
多數係一次性的。
好容易聽左就「當識左」，
咁當然好快忘記。
解決方法：建立堂上＋堂下的雙重循環。
關於成年人學習，亦可以參考我令一篇文章 ↓
所以，堂上學習，應該要有堂上的循環（老師引導、練習、測驗）
而堂後的循環，就係要有你的努力不懈（靠好奇心、持續應用、主動找答案）
呢個不懈的循環亦即係「好奇心」。
對日文產生好奇，有疑問，
平日多啲去搵問題、找答案，有唔明就問。
一有應用日文的機會就去「爭取」，
例如嘗試幫朋友或同學翻譯之類，
咁先至係最好的學習方法。
亦係我平時所講嘅兩條腿走路。
兩條腿走路既含意係？
一條係堂上學習，而一條就係堂下學習。
例如：幫朋友翻譯、追劇時留意字幕、把重複多次的寫下來記低佢。
咁你學左先會意會到：
- 「噫！呢啲說話咪老師呢個星期教左嘅！」
- 「我聽得明喎！」
- 「原來喺呢個時候都可以用㗎！」
語感同聽力都係要咁樣習慣過黎。
如果呢啲喺堂上做就太花時間，而且每人喜好不同。
所以要盡量利用「168小時」去鞏固同「超前學習」。
大魔王的出現
如果唔係嘅話，
一年後或者一年半後，
就會再始忘記「初心」，
特別係沒有再把日文放在首位，然後有更多興趣或工作有調動出現，
開始唔知為乜而學，跟住就好容易「放棄」。
咁係我最唔想見到嘅情況，
亦係對你最「嘥」嘅！！
特別係成年人學員因為各種生活瑣事而特別容易出現呢種情況。
所以一定要有呢個心法，為自己打定底。
就黎打個比喻吧～
學習日文就好似要「煮餸」咁
黎緊嘅日子，學日文就好似你要學習點用廚具。
但每餐要點樣煮，要煮啲乜野，
都係由你去決定同操作。
廚具：文法、詞彙、聽力
食材：日常素材（動漫、新聞、歌曲）
煮餸：實際應用（寫作、會話）
學會用工具只是第一步，最重要是自己決定「煮乜餸」。
如果你學習過程中從未諗過煮啲乜嘅話，
就算你學晒點用刀用爐用鑊，點去調節時間同溫度，
你都只會吸收到門面功夫，只知每樣野點用而唔識得融會貫通！
所以對於準學員的第一課，
介紹比你知你可以點樣煮出自己想煮嘅餸，
就係最重要的事情！
亦即係「製造學習環境」。
如果你已經有了，恭喜你！
未有嘅話，
只要你建立了學習的語境，把日文或日本文化作為精神食糧，
咁你就可以「超前學習」。
就會產生各種疑惑、疑問，問得越多先至會吸收得越多。
而教又可以教得更快，你學又吸收得更好。（堂上學習＋堂下好奇心，才能持續進步）
有甚麼「超前學習」的日文工具可以介紹下嗎？
首選當然是煲多啲劇同追多啲番啦
玩遊戲要破關時聽到的對話同字幕再試着去解決亦都唔錯
在接觸的過程中
有些語感就會自然建立
如果未有，還可以用以下一些網址
初學者：
艾倫的挑戰
視像教學的網站，圍繞各生活日常的會話，
而且還有各種小遊戲提升學習趣味。
興趣導向：
Youtube
相信這個我不用介紹，你都會認識。
喺呢度盡情地找一些自己有興趣的來看吧！
https://www.youtube.com/@AniOneAnime
唔想搵亦找了一個給你方便點擊
小提示：可以開埋自動字幕，追看就更易明白更易學習
進階延伸：
最後當然仲有我的網頁連結
如果你剛開始，又未搵到，
可以去我的首頁，
呢度放左唔少學習相關的網址連結，
都是可以好奇地去睇去了解的。（雖然有好多無更新......汗）
行動指南
今日開始，試試：用日文寫一句日記或追一集有字幕的動畫
呢個就係你第一步嘅「煮餸」！